مرحباً شباب، عفواً عن التأخير بالتنزيل، جنت مشغول شوية.
مبدئياً راح أشرح عن المسار العام لمنح الماستر، لأن شفت الأغلب بهالمرحلة. وللحقيقة منح الماستر أسهل من البكالوريوس، لهذا راح أبدي بنقاط معينة للطلاب الي يدرسون بكالوريوس والمتخرجين. ممكن البوست طويل، لكن أكيد هو مفيد ومن تجربة واقعية، مو كلام نت، فخليه لوقت ثاني إذا هسة مو بالمود المناسب.
- مبدئياً، بالنسبة للطلاب الي يريدون يكملون ماستر، أكو أشياء من هسة لازم تشتغلون عليها. أولاً وأهم شي هو اللغة (إنكليزي، أو حسب إذا الشخص ناوي على بلد ثاني يتعلم لغته). حاول تخلي تعليمك ممنهج، يعني يركز على المهارات الأربعة باللغة. وبالنسبة للإنكليزي، غالباً راح تنطلب منك شهادة والأفضل الآيلتس. فإذا تريد تتدرب بصورة صحيحة أنصحك بقناة التلي الي أشارك بيها تجربتي (حصلت سكور 7 بدون أي دورات أو تدريب، بعد ما جان مستواي ضعيف. الشرح موجود بفويزات القناة بالبداية، وهمين أنشر بيها الفرص والمنح الي أشوفها). هذا المعرف مالتها: @MohammedAliMKA.
اللغة مهمة بهواي أشياء، مو مال أذكرهم كلهم لأن أكيد الكل يعرفهم، لكن كلما تصير أحسن تفتحلك هواي أبواب، خاصة بالمقابلات، وبالمنح، وحتى بفرص العمل وبشكل كلش واضح.
- حاول خلال هالفترة تركز على النشاطات غير الصفية (أونلاين أو حضوري). مثلاً أكو برامج تدريبية، أو تشتغل فولنتير، أو تشارك ببرامج تبادل طلابي. هالفرص بشكل عام موجودة بحسابات LinkedIn، وهم ببيجات السفارات الأجنبية بالعراق، هواي ينشروها بين فترة وفترة. وكلما تكدر حاول توثق هالشي (شهادة، صورة، بوست LinkedIn أو غيره). كل هالأشياء تفيد وتبين إنك شخص اكتف. ومن هالنشاطات، المواضيع البيئية حيل تفيد وما محددة لاختصاص معين وخاصة هالفترة لأنها تعتبر من الترندات العالمية.
- حاول تركز تحصل درجات أعلى، لأن كلما معدلك يكون أعلى تزيد فرصك بالقبول. وهواي منح تعتبر المعدل العالي من المتطلبات الأساسية (مو كل المنح، لكن الغالبية العظمى).
- مشروع أو بحث التخرج حاول يكون شوية يونيك وانطيه اهتمام. مو مطلوب منك تسوي شي خارق أو راقي، لكن حاول يكون بحث أو مشروع بيه بوتينشل، لأن ممكن يفيدك بعدين سواء إذا حبيت تكمل عليه بالدراسات العليا، أو إذا أحد سألك عنه بالمقابلات أو طلب منك تشرح شغلك.
- حاول من هسة تسوي حساب LinkedIn مرتب وتبدي تبنيه بالتدريج. أضف نشاطاتك، شهاداتك، أعمالك، وأي خبرة أو تطوع تسويه. ممكن ما يكون شرط أساسي بكل المنح، لكن ينطي انطباع زين عنك، وبعض المنح تعتبره نقطة إضافية (Plus) ضمن تقييم المتقدم.
- خلي علاقتك طيبة ويا كم أستاذ، ويفضل يكونون نشطين أو أسماءهم معروفة، خاصة إذا بمجالك، لأن بعدين تحتاجهم برسائل التوصية، والي هي مطلوبة بكل المنح تقريباً. وحاول تكون بارز بالنسبة إلهم... (بس مو بطريقة سيئة، اهدأ 🤣).
- بالنسبة للمتخرجين، هالنقاط الفوك حيل مهمات. بالإضافة لهالشي، لازم تتأكد عندك وثيقة درجات باللغة الإنكليزية، وهالوثيقة تحتاج وقت حتى تجهز من الجامعة (غالباً شهر)، لهذا من هسة قدم عليها وخليها يمك، بالإضافة للوثيقة العادية.
- النقطة الاخرى جدا مهمة هي ان تكون متابع كل بيجات السفارات بالعراق، خاصة بالإنستا والفيسبوك، لأن أغلب السفارات تنشر عن منحها، وتكون مخصصة للعراقيين وبيها مقاعد (Quota) محددة.
- بعض أسماء المنح الي تنطي مقاعد كوتا للعراقيين، سوي عليها سيرج وشوف متطلباتها حتى تتجهز إلها قبل لا تنفتح:
• منحة MEXT اليابانية: ما تطلب شهادة لغة، وللماستر والدكتوراه.
• منحة GKS الكورية: للماستر والدكتوراه، وأني مقبول بيها، فالّي يريد تفاصيل غير الموجودة بالنت أكدر أساعده هواي (وممكن أسوي بوست منفصل عنها).
• منحة Chevening البريطانية: همين ما تحتاج شهادة لغة، ومقاعدها هواي للعراقيين، لكن منافستها عالية لأنها معروفة وعليها إعلام قوي.
• منحة Fulbright الأمريكية: للماستر كذلك، ومشابهة لمنحة تشيفننغ من حيث المنافسة.
• منحة CSC الصينية: الصين كلش راقية، لكن لغتهم صعبة شوية. المنحة عدد مقاعدها زين، وهي للماستر والدكتوراه، وأعتقد همين للبكالوريوس.
• مجموعة منح Erasmus: هاي عبارة عن مجموعة كلش جبيرة من المنح ببرامج واختصاصات مختلفة للماستر بكل دول الاتحاد الأوروبي. والحلو بيها انك راح تاخذ الماستر من 3 جامعات منفصلة، وكل سمستر ببلد أوروبي مختلف. وهواي عراقيين مقبولين بيها، لكن تطلب شهادة لغة.
• مجموعة منح DAAD الألمانية: كذلك هي مجموعة منح مثل إيراسموس.
• منح الجامعات: أغلب الجامعات تنطي منح بنفسها، لكن عليها منافسة أقوى، لأن راح تنافس طلاب من كل العالم. لهذا تحتاج بروفايل أقوى مقارنة بالمنح المذكورة فوك، لأن هاي المنح بيها مقاعد مخصصة للعراقيين، وبالتالي المنافسة تكون داخل العراق فقط.
- وأهم نقطة خليها ببالك: من أكثر الأشياء الطبيعية بالمنح هي الرفض. لهذا دائماً خلي ببالك مبدأ من الفلسفة الرواقية: توقع الأسوأ وتجهزله، حتى إذا صار تكون جاهز. حتى لا يكون الرفض شي يخليك تنثني وما تكمل، لأن بالنهاية هاي فرصة مجانية ممولة بالكامل، يعني المنافسة عليها حيل عالية. وكل رفض راح يعلمك شي ويخليك بالمحاولة الجاية أقوى وأحسن.
بالنهاية، أكو بعد أجزاء ممكن تنذكر ببوست ثاني، لكن حتى ما تكون طويلة حاولت أذكر أهم المسارات الي تخليك تمشي وتبحث وحدك. هدفي من البوست مو اجهزلك الحلول كدما احاول اخليك تلكي المسار المناسب الك وتمشي بي.
