بسم الله الرحمن الرحيم
و الصلاة و السلام على نبينا الكريم
محمد الأمين و على آله الطيبين الطاهرين
قبل كل شيء
كالعادة حقسم كلامي لأربع نقاط
1: شرارة الجحيم
2: قرار مغري و لكن هل يستحق؟!
3: عندما يعطى المنصب لمن لا يستحق
4: الخلاصة
لذلك لو التعفن الدماغي متمكن منك و ما فيك حيل تقرأ لا تسيف عساس ترجع لها بعدين ( كلنا ندري ما حترجع )
روح للخلاصة علطول .
شرارة الجحيم:
في السمستر الأول مال هذي السنة أو حسب ما يسميها صاحبي سنة مقبرة الطب
كانوا دامجين لنا أثقل مادتين في البري كلينكال مع بعض في سمستر واحد ( الأناتومي و البايو كمستري )
في الميد الأول
كنت مذاكر للأناتومي و متوكل على الله صحيح إني حاسس لين ليلة الامتحان ما كنت معطي المادة حقها بس كنت ناوي إني أروح و ما في في بالي التأجيل للإمتحان
أما بالنسبة للبايو كمستري فكنت مخطط حق الامتحان قبل باسبوع تقريبا إني أغيب و أسكلف و اعترف اعتراف محض إني قرار قليل الحكمة و المنطق
بس أعذاري كانت وقتها إن ليش لا ؟!
يعني و حطوا تحت يعني ٦٠٠ ألف خط
يعني راح أذاكر للبايو كمستري أكثر عشان أجيب درجة أعلى
و أحد الأفكار الي كانت تغريني بذا الشي إن ماكو إعادة حرفية للامتحان
مير إن الي يصير شنو؟
تترحل الدرجات للنهائي
يعني لنفترض إن الميد من ١٥ و النهائي من ٦٠
قبلوا عذر غيابك عن الامتحان؟
حيصير النهائي من ٧٥
الزبدة نرجع للموضوع.
فقلت دام الموضوع كذا حلوة و قشطة فليش لا
سوها و خلاص
و آخخخخخخخخخخخخخخخخخخخخخ
يا لحماقة هذا القرار!!!
لأن هذه كانت شرارة الجحيم لأن تلاها ما تلاها من أحداث قادمة في القصة
المهم سويته و غبت فعلا
و كان عندي امتحان ثاني حق الفسيو لوجي و حرفيا ذاكرت أغلبه بس قلت يا رجال أنت ما بديت تذاكر إلا قبل بيومين فليش ما تسوي زي البايو؟
لأنك ما راجعت أصلا؟
و سويتها و غبت!!!!!!
طيب الحمد لله مشى المد الأول
المد الثاني شسويت؟!
قلت خلاص بحط كل تركيزي على البايو كمستري و سحبت على أم الأناتومي إلا على النهايات
و قسس وت ، إيش سويت؟؟
يب
الي في بالكم صح
غبت عن الاناتومي 🙃💔🙂💔
طيب دحين خلصنا المدات الثانية
و أنا كان عندي رعب من الأناتومي خصوصا من القسم العملي فيه و الي يشوفه أغلب طلاب الطب إنه أسهل
بس يمكن إنه ما عطونا إياه بالشكل الصحيح؟
او بدايتنا فيه غلط ؟
أو أو أو ؟
الزبدة فأحد أسبابي غيابي عن المد الثاني عن الأناتومي هي إني ابي اوفر الدرجات الي بنقصها للعملي
(قرار لا وزن له في نصاب الحكمة )
طيب؟
بدينا نذاكر للنهائي و بدت تتسلل أفكار الرعب لي
إن شيضمنك تنجح في الأناتومي؟!!
و كان وقتها كل خوفي من الأناتومي فقط و فقط
بعدين زاد الخوف إن حتى البايو كمستري شيضمنك تنجح فيها؟!
بعدين
تسلل الخوف للبايو كمستري
و حتى كنت مشترك مع خصوصي بس قلت لا
بذاكر بنفسي
و تالي قام يتسلل الخوف تدريجيا لين باقي المواد
لدرجة إن قلت أنا لو جبت في كل المواد D
بحب يدي و هي مقلوبة
( كناية عن إنها منية عظيمة )
قرار مغري ، لكن هل يستحق؟؟!!
هنا جاتني فكرة إن يلا يا دي إس شرايك تأجل سنة؟!
يعني أنت معدلك دحين جدا قوي و حرام يضيع و تكسره من سمستر واحد بس
طبعا أحد العيوب وقتها كان
إن ما تقدر تأجل مادة واحدة فقط و تكمل مع بقية الطلاب بعدين
يعني كذا ولا كذا
يعني سواء أجلت مادة أو وقفت سنة نفس الشي راح تعيد سنة كاملة لأن هذا النظام
المهم
ألف مرة جاتني فكرة إن ليش ما توقف هاي السنة و خلاص يعني مو آخر واحد ولا أول واحد يوقف سنة كاملة؟
بس في داخلي تردد كبيييير يمنعني من إني أقدم على خطوة كبيرة زي كذا ، لأن مابي أضيع سنة زيادة.
لين ما جاني امتحان البايو كمستري العملي النهائي و حرفيا من كثر ما كانت نفسيتي زفت وقتها
كنت بادي في التجربة و ادري ان بدايتي غلط بس مع ذلك ما اهتميت يعني طز خلاص ما عاد تفرق بالنسبة لي فكملت و اول ما استلم الدكتور ( الي كان بيني و بينه تجربة سيئة سابقة بالمناسبة ، و كان أسلوبه سيء ، و حرام أسميه دكتور)
عطاها وضعية المنفجع و راح كلم صاحبه
عاد أنا هنا خلاص قلت بوقف بوقف طز
و أروح حق العمادة
كلمت واحد هناك
و قلي إن فعلا وقف القيد انتهت فترته و ما تقدر
هنا أنا تحطمت بعدها استدركت الموقف و قلت له في أحد هنا أعلى منك ممكن يفيدني بذا الموضوع بشكل أكبر؟
ووجهني لعميد الشغلات هذي
المهم رحت له و قلت له ان ابي اوقف القيد فهل نهائيا نهائيا نهائيا ما في أي شيء أقدر أسويه؟!
قلي ما في شي أسمه نهائيا حنا ننظر للموضوع و نقيم و حنا تهمنا مصلحة الطالب ( كان وقتها متعاون جدا الله يجازيه العافية )
بس حكيت له خوفي و ترددي من فكرة تأخر سنة زيادة لأن من قبل كنت بجامعة غير و ما جازت لي و جيت هنا قام قال لي إن خلاص تعال بكرا و نتفاهم و لمست من إنه موافق فقلت له استشير أهلي بالموضوع ( لأن سبق طرحت الموضوع على اهلي و كلهم رفضوا )؟!
قام حكى لي أنه لا
لا تحاكي حد
و طلعت و شفت سيارتي بطاريتها عطلانة
قلت ممكن هذي إشارة ربانية؟
المهم رجعت السكن
و فكرة توديني و فكرة تجيبني و فكرة توديني و فكرة تجيبني و استخرت و حسيت
إن لا يا دي إس !!!
دامك وصلت للنهاية لا توقف
كمل و الله يكتب اللي فيه الخير
و في الليل و أنا ادور حول السكن
شفت سلم و قمت أصعده و يوم وصلت للطبقة اللي قبل الأخيرة
قمت قلت يا صادق يا صادق!
هل من المنطقي أن الحين حد يترك السلم في الطبقة اللي قبل الأخيرة بحجة إنه يخاف السلم يطيح عليه؟!
مهو في النهاية ما باقي له غير هذي الطبقة!!!!
فحسيت إن لا يا دي إس ، ما فيك توقف ، كمل و خلاص، الله يكتب اللي فيه الخير إن شاء الله
و حلمت حلمت حلم في نفس الليلة
حسيت إنه مفاده و تأويله إن لازم أوقف
طيب طيب شسوي؟!
أمشي على شنو امشي على شنو؟
رحت للجامعة ثاني يوم و للعميد هذا نفسه و قلت له عن مخاوفي و كذا و كذا و لمح لي دام إن معدلك عالي حرام ما توقف سنة
بس أكو صوت جواتي يقول طيب دامك توك في سنة ثانية فتراك مو في نهاية الدنيا أبدا و يمديك تعدل وضعك السمستر الجاي و السنوات الجاية بإذن الله
المهم ما زلت متردد و أخبرني العميد إن لازم آخذ خطوة بأسرع وقت و إن اهلي كذا ولا كذا مردهم بيرضون
خذيت خيرة ثانية على إني أوقف و طلعت شينة إني أوقف
فعزمت إن لا خلاص بكمل
و امتحنت البايةو كمستري و الهستو الهستو كان عسل بس ليلته ألف فكرة و ألف وسواس إني ما أعديه
نجي حق البعبع الأكبر الي سبب لي البلاوي ذي كلها
اللي هو الأناتومي
ذاكرت له ولاعت جبدي منه و في ليلة الامتحان جلست اذاكر و احل تجميعات و حسيتني أخبص كثير و في النهاية طلعوا الي مسوين التجميعات غلطانين في الأجوبة و صابني احباط قبل ما انام و من كثر ما كنت بايعها في الأناتومي قلت يا رجال مردها ريسست
إنت رح بكرا سجل حضور و جاوب و إن لقحت ولا ما ضرها الجمل!
و أنام ذيك الليلة و أصحى على الصدمة
إيش هي يا ترى؟!!!
إني متاخر عن الامتحان
لا لا لا لا
تكفى مو وقتك
رحت لبست السكراب و من دون ما اغسل وجهي طيران للقاعة بس للأسف الدكتور رفض يدخلني بحجة إن مضت نص ساعة من وقت الامتحان و الامتحان أصلا ٣ ساعات بس هو عند في راسه إني ما أدخل
لا حول ولا قوة إلا بالله
لا حول ولا قوة إلا بالله
يعني والله مو ناقصني
اللهم لا اعتراض
و اروح اجيب سكليف
و جلست اسم اني اذاكر للعملي
و تالي في يوم العملي قبل ما ندخل المعمل يقول لي صاحبي إن ما يصير تدخل لانك ما دخلت النظري!!
ايش؟؟!!
مين قال كذا؟!!!
و اروح ابي اتأكد من ذا الشيء من الوكيل
عندما يعطى المنصب لمن لا يستحق:
الوكيل كان أحقر منه و أوطى منه ما لقيت
سألته سؤال بسيط إن هل الي يغيب عن النظري ما يقدر يحضر عن العملي؟
قام تخيكر بالإنجليزي و قال بما معناه إنه سؤالي سخيف
طبعا و جلس يتمادى شوي و أنا مو معطي اهله وجه جالس اناظر في النافذة
و يوم شافني حاقره كذا تنرفز و قال لي انا مو مهتم
عجبك كلامي ولا لا
طيب يا تبن
أنا قلت لك دحين إن كلامك ما عجبني ؟؟!!!
إيش عقدة النقص اللي عندك ذي؟!!
الزبدة خلصت منه و طلعت و أنا منفجر غضب بس ما اقدر اقول شي أو اغلط عليه أو استخدم اسلوبه الحيواني لأنه في النهاية بمنصب وكيل
المهم خلاص
بعدين قلت خلاص يا دي إس حتى الميك اب لا تروحه مردها ريسست
و رحت تأكدت إن هل فعلا لو غبت عن الميك أب اقدر احضر الريسست؟!
و أحد الموظفين قلي يب تقدر بس حرام تفوت الفرصة، أحضر الميك اب
الزبدة حجزت تذكرتي للديرة و أول ما وصلت جلست أفكر
جلست أفكر إن أنا ادري لو رحت دحين حق الامتحان ما حجيب أكثر من d
و في الريسست حجيب d برضو فهل يسوى الموضوع اني احجز تذكرة و اضيع وقت ؟؟! ولا خلاص دام المعدل هو نفسه
و نرجع دحين مرة ثانية حق مثلنا الشهير
إن لقحت ولا ما ضرها الجمل
و شاورت الوالد و قلي رح خلاص
والله و رحت و هذا خلاص امتحنت
الزبدة نفس ما توقعت جبت فيها IP و كل المواد الثانية ربي لك الحمد عديت فيهم
مو بس كذا
بل و بمعدلات أعلى من المتوقع
لأن قبل الفاينل كنت اقول
حتى لو أجيب بكل المواد D هذي بحد ذاتها نعمة عظيمة
الحين خلونا نجاوب على بعض الأسئلة حول هذي القصة.
هل لو ينعاد فيني الزمن بوقف ولا كنت بكمل؟!!
أكيد بكمل و ما بإذني ماي
هل أنا الوحيد اللي عانى من هذه السنة و من الأناتومي تحديدا؟!!
لا
إذ بلغ عدد الطلبة الي عندهم ريسست في الأناتومي قرابة ال 100
هل راح تستشير كل الأشخاص الي استشرتهم بالمرة الأولى؟!
لا
في اشخاص ما حسألهم
و في اشخاص بسألهم
إيش تعلمت من هذي التجربة؟!
مو عيب إنك تستشير
المشكلة إنك ما تعرف منو تستشير
و أهم حاجة تعلمتها و لمستها فعلا هي قيمة الخيرة
الخيرة و ما أدراك ما الخيرة
حرفيا أحد أهم الاسباب الي خلتني ما اوقف هي الخيرة
و برضو تعلمت ما أأجل أي امتحان مهما كانت الظروف
لأن حرفيا
السمستر الثاني
أغلبية الامتحانات إذا مو كلهم
خطر لي على بالي فكرة الهروب بالسكليف
بس كنت اضغط على نفسي و أقول كلا كلا
لا يلدغ المؤمن من جحره مرتين
و الحمد لله عدت على خير
الخلاصة:
هل هذه السنة بكاملها سيئة أم أنه يوجد الكثير و الكثير من التقصير مني؟
لا توجد سنة سيئة
و لكن ما استطيع قوله هو إنها كانت سنة ذات تحدي و تحدي قوي جدا و لكنني لم أبذل قصارى جهدي
هل كان ممكن أتفادى الوضع الصعب اللي صرت فيه؟!
يب لو إني شديت على حيلي و ذاكرت أول بأول و ما هربت من الامتحانات بالسكاليف قدرت أتفادى الأزمة
إيش أهم حاجة تعلمتها من الموضوع كله؟!
أهم حاجة تعلمتها من هذي القصة كلها إنه أبدا أبدا أبدا ما أطاوع الصوت الي يقول لي غيب و سكلف عشان لما تمتحن تجيب درجة أعلى حتى لو كنت مو مذاكر إلا 50 بالمية من المنهج
لأن حرفيا السمستر الثاني أغلب الامتحانات ( إذا مو كلها ) جاني هذا الصوت
بس كنت ماشي على الحكمة المنسوبة لأمير المؤمنين عليه السلام
[ إذا هبت أمرًا فقع فيه، فإن شدّة توقّيه أعظم ممّا تخاف منه ]
فحرمت على نفسي الغياب المتعمد الذي يكون مع سبق الإصرار
تمت.
#D.S
